.png)
Qeyri-üzvi materialşünaslıq elmi-tədqiqat laboratoriyası Azərbaycan Respublikası Təhsil Nazirliyinin 1/5 10.03.88 saylı əmri ilə 1988-ci ildə təsis edilmişdir. Bu müddətdə laboratoriya müdirləri 1988-1992-ci illərdə kimya elmləri doktoru, prof. T.M.İlyaslı, 1992-1995-ci illərdə k.e.n., dos. A.V.Eynullayev, 1995-2019-cu illərdə k.e.n., dos. M.R.Allazov olmuşldur.
Laboratoriyada fotohəssas, termoelektrik və maqnit xassəli yarımkeçirici materialların alınmasının elmi əsaslarının yaradılması sahəsində fundamental tədqiqat işləri aparılır. Yarımkeçiricilər kimyası və qeyri-üzvi materialşünaslıq ixtisasları üzrə gənc kadrlar hazırlanır.
Laboratoriyanın əməkdaşları əsasən p-, d-, f- elementlərin, xalkogenidlərin, xalkohalogenidlərin iştirakı ilə yeni fərdi fazalar, bərk məhlullar əmələ gətirən mürəkkəb yarımkeçirici sistemlərin öyrənilməsi və alınmış yeni fazaların maqnit, optiki, elektro-fiziki və sairə xassələrinin tədqiqi və həmçinin, yerli xammalın təkrar emalı, sənaye tullantılarının utilləşdirilməsi işləri ilə məşğul olurlar.
Laboratoriya yarandığı gündən onun əməkdaşları tərəfindən 200-dən artıq sistem tədqiq edilmiş, faza diaqramları qurulmuşdur. Keçid elementlərin iştirakı ilə 40-dan artıq üçlü sistemin likvidus səthinin proyeksiyası qurulmuşdur. Bu tədqiqatların nəticələri öz əksini xarici və respublika jurnallarında dərc olunmuş 2500-dən artıq elmi məqalə, respublika və beynəlxalq əhəmiyyətli konfransların materiallarında işıq üzü görmüş 1500 tezisdə tapmışdır. 40 patent və təqdim olunmuş ixtiralara müsbət rəy alınmışdır. Laboratoriyanın rəhbərliyi ilə “Fiziki-kimyəvi analiz və qeyri-üzvi materialşünaslıq” mövzusu üzrə 12 elmi konfrans keçirilmişdir.
Laboratoriya Kimya Problemləri İnstitutu, AMEA-nın Fizika İnstitutu, Azərbaycan Texniki Universiteti və Fransanın II Montpelye Universiteti ilə sıx əməkdaşlıq edir. Laboratoriyanın əməkdaşları 2 beynəlxalq qrantda iştirak edir.