“Aprel Qələbəsi: Qarabağın İlk Nəfəsi” adlı tədbir keçirildi
2 aprel 2025-ci il tarixində Kimya fakültəsi Tələbə Həmkarlar İttifaqı Komitəsinin təşkilatçılığı ilə Aprel döyüşlərinin 9-cu ildönümü ilə əlaqədar “Aprel Qələbəsi: Qarabağın İlk Nəfəsi” adlı tədbir keçirilmişdir. Aprel döyüşlərinin şanlı tarixini yad etmək məqsədilə keçirilmiş tədbir, Azərbaycan Respublikasının Dövlət Himninin səsləndirilməsi və şəhidlərimizin xatirəsinin bir dəqiqəlik sükutla yad edilməsi ilə başladı. Kimya fakültənin dekan müavini Taleh Qəhrəmanov, Tələbə Həmkarlar İttifaqı Komitəsinin sədri Yusifova Əfsanə, fakültənin 1-ci kurs tələbələri Sadıqova Aytac və Əliyev Murad çıxış edərək bildirdilər ki, aprel döyüşlərdə düşmən üzərində qazanılan hərbi uğurlar Azərbaycan Ordusunun və xalqının Böyük Qələbəyə inamını artırdı. Aprel döyüşləri müasir Azərbaycanın hərb tarixinə qızıl hərflərlə yazılan, Azərbaycan ordusunun qəhrəmanlığını əks etdirən vətən müharibəsində Böyük Qələbəyə gedən yolda mühüm əhəmiyyət kəsb etdi. 44 günlük Vətən müharibəsində Müzəffər Ali Baş Komandan, Prezident İlham Əliyevin rəhbərliyi ilə rəşadətli Azərbaycan Ordusu düşmənə qəti zərbə vuraraq torpaqlarımızı işğaldan azad etdi. Kimya fakültəsinin 2-ci kurs tələbəsi II Qarabağ müharibəsi iştirakçısı, qazi, Əmənov Namiq çıxış edərək kecdiyi döyüş yolundan, zabit və əsgərlərimizin 44 günlük müharibə zamanı döyüşlərdə göstərdikləri qəhrəmanlıqları qeyd etməklə, qəhrəmanlıq tariximizin gənclər arasında təbliğ edilməsi, gənclərə, yetişməkdə olan gənc nəsilə öz qanları və canları bahasına tarix yazan igid vətən övladlarının tanıdılması üçün bu kimi tədbirlərin keçirilməsinin xüsusi əhəmiyyətini vurğuladı. Azərbaycan xalqı öz qəhrəman oğullarını unutmur və onların mübarizə ruhu gələcək nəsillər üçün örnək olaraq qalacaq. Tədbirdə Azərbaycan xalqının qəhrəman övladlarının vətənin azadlığı uğrunda göstərdikləri şücaət və qəhrəmanlıqları, birinci Qarabağ müharibəsi, Aprel döyüşləri, Vətən müharibəsi və antiterror əməliyyatlarını əhatə edən videoçarx təqdim edilib.
