“Azərbaycanlıların Soyqırımi Günü”-nə həsr edilmiş tədbir keçirilib
Bakı Dövlət Universitetinin (BDU) Kimya fakültəsinin Tələbə Gənclər Təşkilatının təşkilatçılığı ilə 31 mart “Azərbaycanlıların Soyqırımi Günü”-nə həsr edilmiş tədbir keçirilib. Tədbir Dövlət Himninin səsləndirilməsi, şəhidlərimizin və soyqırım qurbanlarının xatirəsinin bir dəqiqəlik sükutla yad edilməsi ilə açıq elan edilib. Kimya fakültəsinin sosial məsələlər və tələbələrlə iş üzrə dekan müavini Taleh Qəhrəmanov çıxışı zamanı 1918-ci ildə ermənilərin azərbaycanlılara qarşı həyata keçirdikləri soyqırımı zamanı Azərbaycanın müxtəlif bölgələrində, Bakı şəhərində, Şamaxı, Quba, Xaçmaz, Lənkəran, Zəngəzur, Qarabağ, Naxçıvan və digər ərazilərdə erməni daşnaklarının qanlı qırğınlar törətdiklərini və nəticədə minlərlə azərbaycanlının qətlə yetirildiyini vurğuladı. O bildrdi ki, 31 mart Soyqırımı Azərbaycan tarixində, hətta dünya miqyasında erməni daşnaklarının törətdiyi qanlı cinayət hadisələrindən biridir və gənclərin vətənpərvərlik ruhunda tərbiyə olunmasında bu faciələrin anılması xüsusi əhəmiyyətə malikdir. 1998-ci il martın 26-da Azərbaycan Respublikasının Prezidenti Heydər Əliyevin imzaladığı “Azərbaycanlıların soyqırımı haqqında” fərmanda həmin dəhşətli hadisələrə adekvat siyasi qiymət verilib və 31 mart “Azərbaycanlıların Soyqırımı Günü” elan edilib. Azərbaycan Respublikasının Prezidenti İlham Əliyev 2018-ci il yanvarın 18-də “1918-ci il azərbaycanlıların soyqırımının 100 illiyi haqqında” Sərəncam imzalayıb. Xalqımız və dövlətimiz soyqırımı qurbanlarının xatirəsini əziz tutur, bütün dünyanı ermənilərin iç üzünü görmək üçün bu tarixi hadisələrdən ibrət götürməyə çağırır. Tədbirdə tələbələr tərəfindən ədəbi-bədi kompozisiya təqdim olunub, vətənpərvərlik ruhunda şeirlər səsləndiriblər. Sonda 31 mart soyqırımına həsr olunmuş videoçarx nümayiş etdirilib.
