Bakı Dövlət Universiteti Kimya fakültəsi

Bakı Dövlət Universitetinin (BDU) Kimya fakültəsinin könüllüləri tərəfindən təşkil olunmuş “Gücümüz birliyimizdədir!” adlı tədbir baş tutub. Tədbir Dövlət himninin səsləndirilməsi, Ümumilli Lider Heydər Əliyevin və torpaqlarımızın azadlığı uğrunda həlak olmuş şəhidlərimizin əziz xatirəsinin yad edilməsi ilə başlayıb. Fakültənin Sosial məsələlər və tələbələrlə iş üzrə dekan müavini Taleh Qəhrəmanov bildirdi ki, tədbir 31 Dekabr Dünya Azərbaycanlılarının Həmrəylik Gününə həsr olunub və Kimya fakültəsinin tələbələri arasında milli birlik və həmrəylik ruhunu gücləndirmək məqsədi daşıyır. O, çıxışında Dünya Azərbaycanlılarının Həmrəylik Gününün əhəmiyyətindən danışaraq, bu tarixi günün bütün azərbaycanlıları bir araya gətirən mənəvi dəyər olduğunu vurğulayıb. Taleh Qəhrəmanov qeyd edib ki, bu günün təsis edilməsi Ümummilli Lider Heydər Əliyevin uzaqgörən siyasətinin nəticəsidir. Onun təşəbbüsü ilə təsis olunan bu bayram Azərbaycan xalqının milli həmrəylik ruhunun, müstəqilliyinin qorunmasının, ərazi bütövlüyünün təmin edilməsinin simvoluna çevrilib. Kimya fakültəsi könüllülərinin sədri Röyal Yusiflinin çıxışında həmrəylik ruhunun tələbələr arasında təşviq edilməsi üçün bu cür tədbirlərin mütəmadi keçirilməsinin, birlik və həmrəylik ideyalarının gənclər arasında daha geniş yayılmasına töhfə verməsinin vacibliyini bildirdi. Tədbirdə Kimya fakültəsinin 2-ci kurs tələbəsi Nəzrin Ağazadə 31 Dekabr Dünya Azərbaycanlılarının Həmrəylik Gününə həsr olunmuş şeir səsləndirib, tələbələr tərəfindən hazırlanan ədəbi-bədii kompozisiya, milli birlik və həmrəyliyin önəmini əks etdirən videoçarx təqdim olunub.