Bakı Dövlət Universiteti Kimya fakültəsi

Bakı Dövlət Universitetinin Kimya fakültəsinin Kimya ixtisasının əyani təhsilalma forması üzrə Azərbaycan, rus, ingilis bölmələrinin və Kimya mühəndisliyi ixtisasının Azərbaycan bölməsinin, “Kimya müəllimiyi” ixtisası üzrə Azərbaycan və rus bölmələrinin IV kurs tələbələrinin 2024/2025–ci tədris ili üçün təsdiq olunmuş tədris planına əsasən fevral ayının 17-dən iyulun 5-dək tədris-istehsalat və pedaqoji təcrübələri başlayıb. Tələbələr bu müddət ərzində Azərbaycan Respublikası Elm və Təhsil Nazirliyinin akademik Ə.Quliyev adına Aşqarlar Kimyası İnstitutu, M.Nağıyev adına Kataliz və Qeyri-üzvi Kimya İnstitutu və Y.Məmmədəliyev adına Neft Kimya Prosesləri İnstitutunda, Elm və Təhsil Nazirliyinin Radiasiya Problemləri İnstitutu, Geologiya və Geofizika İnstitutunun Analitik cihaz və avadanlıqlardan kollektiv istifadə mərkəzində və Azərbaycan Qida Təhlükəsizliyi İnstitutunda (AQTİ), BDU-nun nəzdində Gənc İstedadlar liseyində, Hədəf liseyində, 20 saylı, 8 saylı, 135 saylı, 19 saylı, 176 saylı, 60 saylı və 53 saylı məktəblərdə tədris-istehsalat və pedaqoji təcrübə keçəcəklər. Tələbələr bu institutlarda elmi-tədqiqat işlərinə cəlb edilərək öyrəndikləri nəzəri bilikləri real iş şəraitində tətbiq etmək imkanı əldə edəcək, cihaz və avadanlıqların iş prinsipi, aparılan tətdqiqatların mahiyyəti, eləcə də məzmunu ilə yaxından tanış olacaq, müasir kimyanın aktual problemləri, o cümlədən yağlara-yanacaqlara əlavələr, sürtkü materialları, neft kimyası və neft-kimyəvi sintez, tətbiq əhəmiyyətli yeni materiallar hazırlanması istiqamətlərində təcrübi biliklər toplayacaqlar. Həmçinin pedaqoji təcrübələr zamanı tələbələrimiz lisey və orta məktəblərdə tədris prosesində İKT tətbiqetmə, konspekt tərtibetmə, dərsi planlama və düzgün təşkili bacarıqları ilə yanaşı təhsilalanlarla tərbiyə işinin aparılması, inkişafetdirici treninqlər və valideynlərlə işi yaxından öyrənəcəklər. Kimya profilli elmi-tədqiqat institutları ilə əlaqələrin qurulması və tələbələrin bu işdə aktiv iştrakı ölkəmizdə, eləcə də BDU-da elmlə təhsilin inteqrasiyası istiqamətində atılan uğurlu adımlardan biri hesab olunur.