Bakı Dövlət Universiteti Kimya fakültəsi

Bakı Dövlət Universitetinin Kimya fakültəsinin IV kurs tələbələri 2024-2025-ci tədris ilinin yaz semestrində metodist müəllim Paşayeva Arzu Əbülfət qızı ilə Gənc istedadlar liseyində 17 fevral 2025-ci ildən pedaqoji təcrübəyə başlamışlar. Bu təcrübə tələblərin gələcəkdə peşəkar müəllim kimi formalaşmasına, pedaqoji bacarıqlarının inkişaf etdirilməsinə və real sinif mühitində tədris prosesinə yaxından bələd olmalarına imkan yaradır, tələbələr VII-X siniflərdə açıq dərslər keçərək, müasir tədris metodlarını tətbiq edirlər. Onların dərsləri əsasən problem əsaslı təlim, STEM yanaşması, ekoloji biliklərin inteqrasiyası və eksperimental təlim metodları, mövzuların interaktiv tədrisi, qruplarla iş, cütlərlə iş apararaq keçirilir. Keçirilən dərslər həm sinif müəllimləri, həmdə metodist tərəfindən təhlil olunur. Problem əsaslı təlim yanaşması tələbələrin tənqidi və yaradıcı düşünmə bacarıqlarını inkişaf etdirmək üçün istifadə olunaraq, şagirdlərə real həyat problemləri təqdim edilir və onların həlli yollarını araşdırmaları motivasiya edilir. Təcrübəçi tələbələr kimya dərslərində STEM (Elm, Texnologiya, Mühəndislik və Riyaziyyat) yanaşmasını tətbiq etməklə fənlərarası əlaqələri gücləndirərək, kimyanın ekologiya ilə sıx əlaqəsi olduğu nəzərə alınaraq, dərs prosesinə ekoloji problemlərin həlli ilə bağlı məlumatları daxil edirlər. Şagirdlərə gündəlik həyatda rast gəlinən ekoloji problemlərin kimyəvi aspektləri izah edilir və onların həlli yolları müzakirə olunur. Eksperimental yanaşma şagirdlərin kimyanı daha yaxşı qavramasına və nəzəri bilikləri təcrübə ilə möhkəmləndirməsinə kömək edir. Təcrübəçi tələbələr dərs zamanı müxtəlif kimyəvi təcrübələr həyata keçirərək, şagirdləri laboratoriya işlərinə cəlb edirlər. Bu metodika şagirdlərin müşahidə aparmaq, nəticələri təhlil etmək və elmi qanunauyğunluqları daha dərindən anlamaq bacarıqlarını inkişaf etdirir. Təcrübənin ilkin mərhələsində tələbələr pedaqoji fəaliyyətin əsas prinsiplərini mənimsəməyə başlayıblar və məktəb mühitinə uyğunlaşma prosesi uğurla davam edir. Gələcək mərhələlərdə onların sinif idarəetmə bacarıqlarının təkmilləşdirilməsi, şagirdlərin maraq və motivasiyasını artırmaq üçün innovativ yanaşmalardan istifadə edilməsi nəzərdə tutulur. Pedaqoji təcrübənin sonunda tələbələrin əldə etdiyi nəticələr təhlil ediləcək, onların fəaliyyətləri dəyərləndiriləcək və müzakirələr aparılacaqdır. Bu proses tələbələrin peşəkar müəllim kimi yetişməsinə mühüm töhfə verəcəkdir.