Bakı Dövlət Universiteti Kimya fakültəsi

Bakı Dövlət Universitetinin (BDU) Kimya fakültəsi Tələbə Elmi Cəmiyyətinin (TEC) təşkilatçılığı ilə növbəti elmi seminar keçirilib. Tədbirdə fakültənin III kurs tələbəsi Gülər Muradova “Laylı nanostrukturlarla dərman maddələrinin sulu məhluldan sorbsiyası” mövzusunda geniş təqdimatla çıxış edib. Məruzədə müasir nanomaterialların xüsusiyyətləri, onların farmasevtika və kimya sənayesində tətbiq perspektivləri, eləcə də dərman maddələrinin sudan ayrılması və təmizlənməsi prosesində sorbsiya mexanizmləri ətraflı şəkildə izah olunub. Qeyd olunub ki, son illərdə nanostrukturlu materiallar ətraf mühitin qorunması, tibbi preparatların təmizlənməsi və effektiv daşınması sahəsində mühüm elmi yeniliklərdən biri hesab olunur. Xüsusilə laylı nanostrukturlar yüksək səth sahəsinə, selektiv sorbsiya qabiliyyətinə və kimyəvi dayanıqlığa malik olduqları üçün dərman qalıqlarının sulu mühitdən çıxarılmasında böyük əhəmiyyət daşıyır. Seminar zamanı tələbə tərəfindən aparılmış araşdırmaların nəticələri təqdim olunub, müxtəlif sorbentlərin effektivliyi müqayisə edilib və nanostrukturların tətbiqinin gələcək perspektivləri haqqında məlumat verilib. Təqdimatda həmçinin ətraf mühitdə dərman tullantılarının yaratdığı ekoloji problemlər, su hövzələrinin çirklənməsi və bu problemlərin həllində innovativ texnologiyaların rolu xüsusi vurğulanıb. Elmi seminar iştirakçılar tərəfindən maraqla qarşılanıb, mövzu ətrafında geniş müzakirələr aparılıb. Seminarın sonunda Gülər Muradova elmi fəaliyyətdə göstərdiyi fəallığa və uğurlu təqdimatına görə fakültə dekanı tərəfindən təltif olunub.