Tələbələrimizin tədris-istehsalat təcrübələri uğurla davam edir
Bakı Dövlət Universitetinin Kimya fakültəsinin Kimya ixtisası üzrə təhsil alan IV kurs tələbələrinin Azərbaycan Respublikası Elm və Təhsil Nazirliyinin akademik Ə.Quliyev adına Aşqarlar kimyası institutu, M.Nağıyev adına Kataliz və Qeyri-üzvi Kimya İnstitutu və Y.Məmmədəliyev adına Neft Kimya Prosesləri İnstitutunda tədris-istehsalat təcrübələri uğurla davam edir. Tələbələr mayın sonuna qədər bu institutlarda elmi-tədqiqat işlərinə cəlb edilərək öyrəndikləri nəzəri bilikləri real iş şəraitində tətbiq etmək imkanı əldə edəcək, cihaz-avadanlıqların iş prinsipi, fiziki-kimyəvi analiz üsulları və aparılan tətdqiqatların mahiyyəti ilə yaxından tanış olacaq, bəzi təcrübələri birbaşa izləyə biləcək, müasir kimyanın aktual problemləri, o cümlədən yağlara-yanacaqlara əlavələr, sürtkü materialları, neft kimyası və neft-kimyəvi sintez, tətbiq əhəmiyyətli yeni materiallar hazırlanması istiqamətlərində təcrübi biliklər toplayacaqlar. Kimya profilli elmi-tədqiqat institutları ilə əlaqələrin qurulması və tələbələrin bu işdə aktiv iştrakı ölkəmizdə, eləcə də BDU-da elmlə təhsilin inteqrasiyası istiqamətində atılan uğurlu addımlardan biri hesab olunur.
