Bakı Dövlət Universiteti Kimya fakültəsi

Avropa İttifaqının maliyyə dəstəyi, BMT-nin Əhali Fondu və BMT-nin Qadınlar Agentliyinin təşkilatçılığı ilə həyata keçirilən "Gender əsaslı zorakılıq və ayrı-seçkiliyə qarşı Debat Forumu" layihəsinə yekun vurulub.  Təlim və debatlarda ölkənin 5 regionu üzrə ümumilikdə 1000-dən artıq 13-26 yaş aralığında olan yeniyetmə və gənc qız və oğlan iştirak edib. Layihə 25 noyabr - 10 dekabr tarixlərində həyata keçirilən qadınlara və qızlara qarşı zorakılıqla mübarizəyə həsr olunmuş 16 Günlük Fəallıq tədbirləri çərçivəsində Əmək və Əhalinin Sosial Müdafiəsi Nazirliyi, Gənclər və İdman Nazirliyi, Elm və Təhsil Nazirliyi və Ailə, Qadın və Uşaq Problemləri üzrə Dövlət Komitəsinin dəstəyi ilə "Vətəndaş Cəmiyyətində Debat" İctimai Birliyi tərəfindən icra edilib.

Turnirdə Bakı Dövlət Universitetini rus bölməsi üzrə "Triada" adlı komandası təmsil edib. Bütün mərhələləri uğurla başa vuraraq final mərhələsində qalib gəlib. Kimya fakültəsinin tələbəsi Ülviyyə Hüseynova turnirin çempionu və eyni zamanda ən yaxşı natiqi adına layiq görülüb. Qalib və finalçılar Gənclər və idman nazirliyi, Təhsil və Elm nazirliyi, Sosial müdafiə fondu, BMT-nin əhali fondu tərəfindən mükafatlandırılıb. Ülviyyə Hüseynovanı təbrik edir, uğurlar arzulayırıq.