Bakı Dövlət Universiteti Kimya fakültəsi

Bakı Dövlət Universitetinin (BDU) Kimya fakültəsinin könüllüləri və “You will speak” ingilis dili mərkəzinin birgə təşkilatçılığı ilə “Xaricdə təhsil: Sənin arzun, sənin hədəfin” adlı təlim keçirilib. Tədbir Kimya fakültəsinin sosial məsələlər və tələbələrlə iş üzrə dekan müavini Taleh Qəhrəmanovun açılış nitqi ilə başlayıb. O, çıxışında xaricdə təhsilin gənclərin fərdi inkişafında və peşəkar karyerasında oynadığı əhəmiyyətli roldan bəhs edib. Eyni zamanda, ingilis dili biliklərinin bu prosesdə əsas amillərdən biri olduğunu vurğulayıb. Daha sonra tədbirdə “You will speak” ingilis dili mərkəzinin təsisçisi və direktoru Günay Rəsulova çıxış edib. O, xaricdə təhsil üçün hazırlıq mərhələləri, universitet seçimi, maliyyə planlaması, təqaüd imkanları, tələb olunan sənədlər və qəbul prosesi haqqında geniş məlumat təqdim edib. Günay Rəsulova həmçinin şəxsi təcrübələrini paylaşaraq iştirakçılara motivasiya verib və xaricdə təhsil arzusunda olan tələbələr üçün faydalı tövsiyələr səsləndirib. Təlimin sonunda tələbələrin mövzu ilə bağlı sualları cavablandırılıb. İştirakçılar xaricdə təhsil almaq üçün hansı addımları atmalı olduqlarını daha yaxşı başa düşüblər. Bu cür tədbirlər tələbələrin xaricdə təhsil imkanları haqqında məlumatlılığını artırmaqla yanaşı, onların gələcək akademik və karyera planlarının formalaşmasına imkan verib. Tələbələrin inkişafına yönəlmiş bu cür maarifləndirici fəaliyyətlərin davamlı olması planlaşdırılıb.