“YARAT” Müasir İncəsənət Mərkəzinə ekskursiya təşkil olunub

24 Aprel 2026 12:04

Bakı Dövlət Universitetinin (BDU) Kimya fakültəsinin Tələbə Gənclər Təşkilatının (TGT) təşkilatçılığı ilə “YARAT” Müasir İncəsənət Mərkəzinə ekskursiya təşkil olunub. Ziyarətin əsas məqsədi tələbələrin asudə vaxtını səmərəli dəyərləndirmək, dünyagörüşlərini genişləndirmək və onları müasir incəsənətin müxtəlif istiqamətləri ilə yaxından tanış etmək olub. Ekskursiya zamanı tələbələr mərkəzdə nümayiş olunan “Matrix” sərgisini maraqla izləyiblər. Sərgi çərçivəsində təqdim olunan əsərlər tələbələrdə fərqli təəssüratlar yaradıb. Onlar incəsənətin texnologiya və fəlsəfə ilə vəhdətini əks etdirən instalyasiyalarla tanış olub, əsərlərin mahiyyəti ətrafında müzakirələr aparıblar. Sərginin qeyri-adi konsepsiyası və vizual həlləri tələbələr tərəfindən rəğbətlə qarşılanıb. Səfərin sonunda tələbələr bu maraqlı ekskursiyanı xatirə foto ilə yekunlaşdırıblar.